Home Health & Fitness பச்சிளங்குழந்தைக்கு மலச்சிக்கல் உண்டாகுமா? எப்படி அறிவது? எது சாதாரணமானது

பச்சிளங்குழந்தைக்கு மலச்சிக்கல் உண்டாகுமா? எப்படி அறிவது? எது சாதாரணமானது

புதிதாக பிறந்த பச்சிளங்குழந்தைகள் ஒரு நாளைக்கு குடல் அசைவை பல முறை கொண்டிருப்பார்கள். பிறந்த முதல் வாரம் வரை குழந்தை நாள் ஒன்றுக்கு 5 முதல் 10 முறை மலம் கழிப்பார்கள். முதல் குடல் இயக்கத்தின் போது மலம் கடினமாக, ஒட்டும் தன்மையோடு கருப்பு நிறத்தில் தார் போன்று இருக்கும்.இது கவலைகொள்ள வேண்டியதில்லை. ஒவ்வொரு முறை தாய்ப்பாலுக்கு பிறகும் குழந்தை மலம் கழிப்பார்கள். படிப்படியாக குழந்தை பிறந்த ஒரு மாத காலத்துக்கு பிறகு குடல் இயக்கங்களின் எண்ணிக்கை குறையும்.

பிறந்த குழந்தையின் முதல் இரண்டு மாதங்கள் தான் அம்மாக்கள் அதிகம் கவனிக்க வேண்டிய காலங்கள். நீங்கள் குழந்தைக்கு தாய்ப்பால் புகட்டுகிறீர்களா அல்லது ஃபார்முலா பால் கொடுக்கிறீர்களா என்பதை பொறுத்து அவர்களது குடல் இயக்கங்கள், செரிமான அமைப்பு மாறுபடும்.

பச்சிளம் குழந்தை மலச்சிக்கல்
குழந்தை பிறந்த ஆறு வாரங்களுக்கு பிறகு அல்லது ஒன்றரை மாதங்களில் குடல் இயக்கம் அதிகம் இருக்காது. இந்த நாட்களில் குழந்தை வசதியாகவும் ஆரோக்கியமாகவும்

 

இருப்பார்கள். இந்த இடத்தில் அம்மாக்கள் புரிந்துகொள்ள வேண்டிய முக்கியமான விஷயம் குழந்தையின் மலம் வழக்கம்போல் சிரமமில்லாமல் கழிக்க வேண்டும் என்பது தான்.

 

குழந்தைக்கு மலம் கழிப்பதில் சிக்கல் தான்

 

என்பதை குழந்தையின் முகம் பார்த்து கண்டறிந்துவிடலாம். குழந்தையின் வயிறு கடினமாக இருக்கும். சற்று பெரியதாக வீங்கியபடி இருக்கும். குழந்தையின் முகம் தொடர்ந்து சில நிமிடங்கள் வரை சிவப்பாக இருக்கும். பிறகு குழந்தை முக்கி முனகி மலம் கழிக்க கூடும்.

 

குழந்தை மலம் கழிக்கும் போது அவர்களது ஆசன வாய் பகுதியிலிருந்து இலேசான சீழ் போன்ற திரவம் வெளியேறலாம். மலம் கழித்த பிறகு அந்த பகுதியின் சருமம் தடித்து, சொரசொரப்பாக இருக்கலாம். இதனால் குழந்தை மலம் கழித்த பின்பும் வெகு நேரம் அழுதுகொண்டே இருப்பார்கள்.

மலம் அதிக இறுக்கமாக துகள்கள் போன்று வெளிப்படும். அதிகமான சிக்கல்களுக்கு உள்ளாகும் போது ரத்தபோக்கும் உண்டாகலாம். குழந்தை விட்டு விட்டு மலத்தை வெளியேற்றலாம். இது நாள்பட்டு இருக்கும் போது குழந்தைக்கு மலச்சிக்கல் என்பதை உறுதி செய்துவிடலாம்.

முதல் மாதம் வரை குழந்தை அதிக நேரம் தூங்குவார்கள். அவர்களுக்கு விழிப்பு வரும் வரை அம்மாக்கள் தொல்லை செய்வதில்லை. இதனால் குழந்தைக்கு தாய்ப்பால் பற்றாக்குறை ஆகிறது. அதனால் தான் குழந்தைக்கு மலச்சிக்கல் உண்டாகும். அதனால் குழந்தை தூங்கினாலும் தட்டி எழுப்பி சரியான இடைவேளையில் பால் புகட்ட வேண்டும்.

குழந்தைக்கு மலச்சிக்கல் என்றால் அதிலும் ஒரு மாதக்குழந்தைக்கு மலச்சிக்கல் வந்தால் அதற்கு தீர்வு தாய்ப்பால் தான். உரிய இடைவேளையில் தாமதிக்காமல் தாய்ப்பால் கொடுப்பதன் மூலம் குழந்தையின் மலச்சிக்கலை போக்க கூடும். நீங்கள் ஃபார்முலா பாலை குழந்தைக்கு கொடுத்தால் மருத்துவரை அணுகி உரிய தீர்வு பெறலாம்.

குழந்தைக்கு போதுமான தாய்ப்பால் கிடைக்கும் போது பச்சிளங்குழந்தை மலச்சிக்கலை அரிதாக சந்திக்கிறார்கள். இரண்டு மாதங்களுக்கு பிறகு உள்ள குழந்தைகள் 4 நாட்கள் முதல் ஒரு வாரம் வரை மலம் கழிக்காமலும் இருப்பார்கள். (சில குழந்தைகள் பசியாறிய பிறகு அல்லது தினமும் ஒரு முறையாவது மலம் கழிப்பதும் உண்டு ) இதற்கு காரணம் மலச்சிக்கல் என்று நினைக்க வேண்டாம். ஏனெனில் இந்த காலங்களில் குழந்தைக்கு தாய்ப்பால் மட்டுமே என்பதால் உடலில் கழிவு சிறிய அளவில் இருக்கும்.

அதனால் சிறுநீர் வழியாகவெ உடல் நச்சு வெளியேறிவிடக்கூடும். அதனால் தாய்ப்பால் நிறைவாக குடிக்கும் குழந்தை இரண்டு மாதங்களுக்கு பிறகு தினசரி மலம் கழிக்கவில்லையென்று கவலை கொள்ள வேண்டியதில்லை. எப்போது மலம் கழிக்கிறார்களோ அப்போது அசெளகரியமில்லாமல் இருக்கிறார்களா என்பதை மட்டும் கவனித்தால் போதுமானது.

குழந்தையின் குடல் இயக்கங்கள்

உண்மையில் பெரும்பாலான குழந்தை மலச்சிக்கலை அடையும் போது அதற்கு காரணமாக இருப்பது அவர்கள் தாய்ப்பாலுடன் சேர்ந்து எடுத்துகொள்ளும் இணை உணவுகள் தான். அந்த நாட்களின் போது குழந்தை 4 மாதங்களை கடந்துவிட்டிருப்பார்கள். ஆறுமாதங்களுக்கு பிந்தைய தாய்ப்பாலுக்கு இணையாக கொடுக்கும் இணை உணவு அதிக திரவமாக, நார்ச்சத்து நிறைந்ததாக கவனித்து கொடுக்க வேண்டும். இதற்கான உணவு அட்டவணையை மருத்துவரே பரிந்துரைப்பார்.அதை சரியாக பின்பற்றினாலே குழந்தைகள் மலச்சிக்கல் இல்லாமல் இருப்பார்கள்.

குழந்தையின் குடல் இயக்கங்கள் சீராக இயங்க நீங்கள் குழந்தைக்கு தினசரி மசாஜ் செய்வதும் அவசியம். தினமும் காலை குழந்தையின் தொடைகளை இலேசாக பிடித்து வட்ட வடிவில் மெதுவாக சைக்கிள் மிதிப்பது போல் சுற்றி மசாஜ் செய்ய வேண்டும். குழந்தையின் வயிற்றில் இலேசாக எண்ணெய் வைத்து மசாஜ் செய்ய வேண்டும். உணவோடு கூடிய இந்த பயிற்சிகள் குழந்தையின் மலச்சிக்கலை தவிர்த்து குடல் இயக்கத்தை தூண்டும்.

பச்சிளங்குழந்தை இரண்டு மாதங்கள் வரை மலம் கழிக்கும் முறையில் சாதாணம், அசாதாரணம் இரண்டையும் தெரிந்துகொண்டால் போதுமானது.